خواب میں اڑنا

خواب میں اڑنے کی  کئی تعبیریں بتائی ہیں۔ حضرت دانیال علیہ السلام نے فرمایا کہ  اگر کوئی شخص خواب میں دیکھے کہ پرندے کی جگہ اڑ رہا ہے اور آسمان میں گم ہو گیا ہے اور پھر لوٹ کر زمین کی طرف بھی نہیں آیا تو اس کی تعبیر یہ ہے کہ وہ دنیا سے بہت جلد رخصت ہونے والا ہے۔ یعنی مرنے والا ہے لہذا موت کی تیاری کر لیں۔

حضرت محمد ابن سیرین رحمہ اللہ تعالی نے فرمایا: کہ اگر کوئی شخص دیکھے کہ اس کو پر لگے ہوئے ہیں اور وہ قبلے کی طرف سے اڑا ہے اور پھر اپنی جگہ پر واپس آ گیا ہے تو دلیل ہے کہ سفر سے جلدی واپس آئے گا اور بہت سا نفع اٹھائے گا اور اگر بغیر پر کے اڑتا ہے۔ تو دلیل ہے کہ اپنی حالت سے پھرے گا یعنی امیر غریب اور غریب امیر اور نیک بد اور برا شخص نیک ہو جائے گا اور اگر دیکھے کہ اپنی چھت سے دوسری چھت پر اڑا ہے تو دلیل ہے کہ اپنی بیوی کو طلاق دے کر دوسری عورت سے شادی کرے گا۔

حضرت ابراہیم کرمانی رحمہ اللہ تعالی نے فرمایا: کہ اگر کوئی شخص دیکھے کہ آسمان پر اڑ رہا ہے تو دلیل ہے کہ وہ حج کرے گا  اور اگر دیکھے کہ اپنے گھر سے کسی گھر کی طرف اڑا ہے  تو تعبیر ہے کہ اس کی موت قریب آئی ہے اسے چاہیے کہ گناہوں سے توبہ کر لیں ۔

حضرت امام جعفر صادق رحمہ اللہ تعالی نے فرمایا  کہ خواب میں اڑنا پانچ وجہ سے ہوتا ہے اور اس کی پانچ تعبیریں ہیں

نمبر ایک سفر

نمبر دو حج

 نمبر تین بزرگی

 نمبر چار تغییر حال

 نمبر پانچ مرض الموت